9th Grade Excuses: Sijo IX
I nevah know, I wen forget, I lef ’em home, I no wuz hea
Wen you told us dis? Wat I spposed to do? Wat? Dis one? Fo realz?
You jokin’ me? I nevah understan, someone else wen take ’em.
I no like do ’em, I no can do ’em, I wen turn ’em in,
My maddah wen trow ’em away ’cause she was mad at me,
My maddah and faddah wen fight and I tink I no wuz home.
I nevah had pencil, I nevah had pepah, I wen lose ’em.
I wuz at one party, I had fo go church, I no can fine ’em.
I had chokes adda stuffs fo do, it stay at my addah house.
I nevah taht we had fo do ’em, and I nevah know how,
Miss, wen fall in da dog dish and wen get all wet and stink,
I going do ’em aftah, I going do ’em latahs, if can. Can?
Karen K.L. Espaniola April 10, 2012
hinarising 